Главната цел на проектот е соодветна поддршка на децата со нарушување од спектарот на аутизам со цел адаптација во училиште, преку индивидуални и групни третмани за развој на одредени социјални и едукативни вештини.

Во изминатиот период успешно реализиравме дел од предвидените активности. Започнавме со групна и индивидуална работа со пет деца со аутизам кои во септември оваа година започнаа во прво одделение. За време на индивидуалните и групните часови се работи на развој на социјални и едукативни вештини кои им се потребни на самите деца.

Другата цел на проектот е насочена кон едукација на родителите, наставниците и асистентите кои се активно вклучени и ја имаат главната улога во наставниот процес на учениците. За реализирање на оваа цел во месец aприл организиравме и успешно реализиравме три обуки за изработка на визуелна поддршка на учениците со аутизам.

Овие работилници беа наменети за родителите на самите деца, нивните наставници и образовни асистенти. Преку овие работилници наставниците и асистентите имаа можност да се запознаат со специфичните карактеристики на лицата со аутизам, како да ја адаптираат наставата, кои методи и нагледни средства можат да ги користат и како да создадат средина која ќе влијае врз подобрување на социјалните однесувања на учениците.

Преку успешна соработка со родителите, наставниците и асистентите се надеваме на успешна адаптација на учениците во училишната средина.

Проектот е поддржан од Министерството за политички систем и односи меѓу заедниците.